Блогын Google-да біріншіге қою әркімнің арманы деп ойлаймын. Блогқа келушілердің басым бөлігі іздеу жүйелері арқылы келетіні айғақ. Сондықтан Google-да блогыңызды біріншіге қою хаққында аздаған кеңестерді бөлісейін. Бұл жолғы кеңестер Google-де қалай #1 болу керектігі жайында болғандықтан, жақсы блоггерлерге арналған кеңестен бөлектеу. 

1. Блогыңызда қажетті, кілт сөздерге сәйкесетін мақала жазыңыз. Іздеу жүйелері арқылы келген қонақтардың қандай сөз арқылы келгенін, көбін қандай нәрсе толғандыратынына қарауыңызға болады.

2. Мақаланың тақырыбын таңдау өте маңызды. Іздеу жүйелері алдымен тақырыбына көңіл бөледі. Кейбір блогшылар адамдарды тарту үшін тақырыбын мақалаға байланыссыз таңдайды.

3. Қазіргі болып жатқан, халықтың көңілінде жүрген мәселені қозғай біліңіз. Себебі адамдар бір нәрсе білмесе алдарындағы Google мырзаға жүгінеді.

4. Қажетті жағдайда жазудың тақырыбын да өзгертіп тұрыңыз. Іздеу жүйелері cache істеген кезде бір мақала әр түрлі атпен жүре береді де, халыққа таңдау болады.

5. Блогтың дизайны мен форматы да іздеу жүйелеріне әсер етеді. Жақсы қатесіз блогтарды олар ең басына қояды.

6. Мақалаға таг (tags) дұрыс таңдай біліңіз, себебі Technorati, WordPress сияқты блогпортал сайттарынан көпшілігі белгілі таг арқылы келеді.

7. Линк алмасыңыз. Google PageRank-i жоғары, көпшілікке танымал сайттармен линк алмассаңыз, ол да блогтың маңыздылығын көрсетеді.

8. Сурет пен видеоны қолданғанда абай болыңыз. Іздеу жүйелері блогтың ашылу жылдамдығына да көп көңіл бөледі.

9. Қажетті жағдайда кілт сөзді мақала ортасында қайталаңыз. Себебі кей жағдайда кілт сөздің қайталануына қарай мақаланы маңызды деп көрсетеді.

10. Мақаланың және блогтың қай тілде жазылғаны маңызды. Әрине бұл жағдайда ағылшын, жапон немесе қытай тілді блогтар ұтады. Бірақ, бір қуантарлығы соңғы кезде қазақша кілт сөз арқылы Google-ден тауып келетіндер көбейді.

«Блогтарыңыз әрдайым Google-дa біріншіде тұрып, ұзағынан сүйіндірсін!»