Блогтағы жазбаларымның саны 100ге толды

Алғаш блогты MSN Spaces-те бастап, соңынан оңтайлығы үшін WordPress-ке көшірген болатынмын. Блогты бастаған күннен бері 1 жыл өтіп, жазуларымның саны бүгін 100ге жетіп отыр. Ал кешегі күні (2008-01-26) блогқа келген қонақтардың саны бұрын соңды болмаған көрсеткіш көрсетті.

Блогты жүргізе бастаған кезде қазақша блог көрсек төбеміз көкке жеткендей болатын еді. Ал бүгін блогшылардың саны біршама көбейді. Блог жайлы семинар, дөңгелек үстел өткізіп, алды конференцияларға дейін қатысып жатыр. Қазіргі үрдіспен жүре беретін болса, алдағы уақытта блогшылар саны өте көп артады деп ойлаймын, егер өсіп келе жатқан миллиондаған қазақ тілді жас жеткіншектер мен бүлдіршіндерді еске түсірсек.

Ал блогты азаматтық журналистика деп көретін болсақ, осы азаматтық журналистикада өз басым көптеген тәжірибе жинақтадым. Блог жүргізу өзгеден көп, өзіме пайдалы болды. Әрі өзіме көптеген достар тауып алдым

Алдыңғы жазбаларға есеп бере кетер болсам, oсы 99+1 жазбаның ішінде
Жақсы блоггер болушыларға арналған 10 кеңес, Сергей Бодров - “Монгол”, Қазақ блоггері Жанарбек деген кім?, Сіз білесіз бе?, RSS деген не? сияқты қатарлы жазбалар ең көп оқылып, талқыланған екен.

Баяғыда Жеті жетімді атаңыз дегенде айтқан екен:
1.      Тыңдалмаған сөз
2.      Қиюсыз без
3.      Иесіз жер
4.      Басшысы жоқ ел
5.      Аққу-қазсыз көл
6.      Жерінен айырылған ер
7.      Замандасы қалмаған адам деп.
Айтылған сөз тыңдалмағанындай, блогтың оқырманы жоқ болса, блог та жетім болар еді. Сондықтан блогымды жетімсіретпей келіп, құнды пікірлерін жазып кетіп жүрген оқырмандарға ризашылығым шексіз. Алда блогта көптеген жақсы жазбалар Сіздерді күтеді деген сенімдемін.